Bekakalung atawa Begalang Banang Kasan Jimat Menyekutukan Allah (Bagian kedua dari Tulisan bersambung )
By : Abu Farabi al-Banjar
Tulisan tedahulu bengaran Tradisi Urang Banjar Nang Menyelisihi Syari’at Islam , handak ditaruskan kebagian yang kedua, tapi ngarannya diganti lawan ngaran yang hanyar : “ Urang Banjar Menggawi Syirik “.
Penulis sudah tuha, kadada gawian lagi, saban hari mambaca aja gawian, bisa jua muyak, maka kai menulis, kasan mamadahi pecucuan, kemanakan, bubuhan lawan papadaan kita urang banjar, supaya kada sasat jalan.
Urang yang wayah ini meaku sudah maju pikirannya, kada lagi kolot angkaya urang bahari, tapi banyak gawian nini pedatuan bahari yang mengaramput kita umpati, atawa ujar urang wayah ini diwarisi. Kalu harta yang diwarisi kada salah, tapi nang diwarisi gawian syirik turun temurun, sampai keurang-urang yang anum umpat juga menggawinya.
Urang bahari yang diumpati urang wayah ini, kada paham salawasan hidupnya mulai bangun guring, imbah itu guring pulang ada aja yang tasalah agamanya.Inya meakui Allah itu ahad, tapi menggawi jua yang ngarannya syirik, syirik tegawi karena kada handak umpat beguru tauhid . Umpat aja pang kepangajian , lamun inya tasalah beguru lawan guru tasauf, yang dikaji Nur Muhammad. Kalu macam itu tasalah kaji ngarannya.
Tahulah ikam barataan ,gawian kita urang banjar ,kalu bininya beranakan halus, anaknya diolahkan kakalung benang hirang, digantungi bungkusan kain hirang baisi bakas tangkai tali pusat yang sudah karing. Kalu kada diandaki jimat tangkai tali pusat dipenggulunya, rancak garing, lamah bulu. Maka dibari pelindung jimat dipenggulunya, jimat itu kawa jua ujar urang melindungi kekanakan halus kada kana di isap buyu. Apa garang nang ngarannya buyu itu ? Tahukah ikam barataan, kalu kekakanan halus ( balita) kena penyakit di isap buyu awaknya kurus karing, kalu ujar doktor kurang gizi. Kawalah kekananak kurang gizi dilindungi lawan jimat tangkai tali pusat?.
Meandaki kekalung jimat di penggulu kanak-kanak halus kasan pelindung, sama ai artinya meanggap jimat ada kekuatannya lawan kekuasaan, padahal yang baiisi kekuasaan hanya Allah. Kalu macam itu artinya jimat itu kaya Allah Subhanahu Wata’ala jualah ? Ini yang ngarannya syirik.
Coba ikam barataan ibaratnya yang bujang atawa yang balu baisi larangan (tunangan/pacar), larangan ikam itu kada tahunya basambunyi ada pulang baiisi larangan urang lain, syarik kada ikam,kalu kada syarik ketalaluan ngarannya. Urang barataan syarik kalu mandangar larangannya ada baisi larangan nang lain. Apala lagi Allah Nang Maha Tahu Segalanya, marah banar kalau manusia olahan-Nya menduakan-Nya lawan makhluk lain.
Kalu handak tahu apa ujar Allah sual syirik,ikam buka al-Qur’an surah al-An’am ayat 14, ikam baca bujur-bujur, ikam cari artinya , nah ikam batamu ayat kaya dibawah ini “
قُلْ أَغَيْرَ اللّهِ أَتَّخِذُ وَلِيًّا فَاطِرِ السَّمَاوَاتِ وَالأَرْضِ وَهُوَ يُطْعِمُ وَلاَ يُطْعَمُ قُلْ إِنِّيَ أُمِرْتُ أَنْ أَكُونَ أَوَّلَ مَنْ أَسْلَمَ وَلاَ تَكُونَنَّ مِنَ الْمُشْرِكَينَ
."
Padahkanlah : “ Apakah handak aku jadikanpelindung selain Allah yang meolah langi lawan bumi, padaha Dia membari makan lawan kada mambari makan?. Padahkanlah : “ Sebujurnya aku disuruh supaya aku menjadi urang yang bedahulu b esarah diri ( lawan Allah), lawan jangan coba-coba ikam barataan masuk kedalam bubuhan urang musyrik,.:
(Katakanlah: "Apakah akan aku jadikan pelindung selain dari Allah yang menjadikan langit dan bumi, padahal Dia memberi makan dan tidak memberi makan?" Katakanlah: "Sesungguhnya aku diperintah supaya aku menjadi orang yang pertama kali menyerah diri (kepada Allah), dan jangan sekali-kali kamu masuk golongan orang musyrik)
Kalu ikam syirik , percuma ikam tunggang ruat sebahyang, bahimat banar baibadah, behampas bepangkung beamal siang malam, kada tahu lagi burit kepala, kadada artinya, amal pahala ikam habis samuannya. Kalu kada parcaya, ikam baca al-qur’an surah Az-Zumar ayat 65. Ujar Allah Ta’ala :
وَلَقَدْ أُوحِيَ إِلَيْكَ وَإِلَى الَّذِينَ مِنْ قَبْلِكَ لَئِنْ أَشْرَكْتَ لَيَحْبَطَنَّ عَمَلُكَ وَلَتَكُونَنَّ مِنَ الْخَاسِرِينَ
.
Sebujurnya sudah diwahyukan lawan ikam , jua lawan nabi- nabi sebeluman .
ikam, kalu ikam menyekutukan( Allah), habis samuaan amal ikam,mau kada mau ikam, masuk bubuhan yang merugi .
(Dan sesungguhnya telah diwahyukan kepadamu dan kepada (nabi-nabi) yang sebelummu. "Jika kamu mempersekutukan (Tuhan), niscaya akan hapuslah amalmu dan tentulah kamu termasuk orang-orang yang merugi)
Kalu sudah menggawi syirik bedosa ganal, imbah itu dosa syirik kada diampuni Allah, kenapa kada diampuni, Allah Ta’ala berfirman di al-Qur’an surah An Nisaa ayat 48 :-
إِنَّ اللّهَ لاَ يَغْفِرُ أَن يُشْرَكَ بِهِ وَيَغْفِرُ مَا دُونَ ذَلِكَ لِمَن يَشَاء وَمَن يُشْرِكْ بِاللّهِ فَقَدِ افْتَرَى إِثْمًا عَظِيمًا
Sebujurnya Allah kada handak maampuni dosa syirik, Allah maampuni semuan dosa urang-urang yang dihandaki-Nya. Siapa yang menyekutukan Allah, inya meolah dosa ganal.r.
(Seungguhnya Allah tidak akan mengampuni dosa syirik, dan Dia mengampuni segala dosa yang selain dari (syirik) itu, bagi siapa yang dikehendaki-Nya. Barangsiapa yang mempersekutukan Allah, maka sungguh ia telah berbuat dosa yang besar. )
Ulama meartikan dosa syirik kada diampuni Allah, kalu mati kada sampat betobat minta ampun. Kalu dosa lainnya biar kada sampat betobat, lalu mati .Allah masih handak membari ampunan, itupun kalau Allah handak, kalau kada ya apa boleh buat.
Dingsanak barataan jangan takutan, kalu badosa Allah bujur-bujur membari ampunan, biar ikam barataan membawa dosa yang ganal kaya gunung, Allah datang membari ampunan seganal langit lawan bumi. Ayu mana ganal gunung lawan langit ditambahi bumi.
Mengalungi kanak-kanak lawan jimat benang hirang yang dikesahkan tadi, kadapang karangan aku sorang, kadabulih bekekalung benang hirang atawa apa aja kasan jimat itu ujar Rasullulah shalalalhu ‘alaihi wasallam. Kalu ikam barataan ada kada percaya, ikam itihi (lihat dan periksa ) hadits shahih riwayat Imam Abu Daud rahimahullah datang tumat Zainab bininya Abdullah bin mas’ud radhyallaahu ‘anhum, ujarnya :
“ Lakiku Abdullah bin Mas’ud melihat aku bekakalung benang hirang dipengguluku , lalu ia betakun : apa ini ? Aku jawab : Benang untuk meobatiku ( meruqyah) “ Zainab b ekesah, lalu Abdullah bin Mas’ud merunggutnya matan pengguluku lalu ditataknya., sambil menggerunum: ikam barataan bubuhan Abdullah , sebujurnya kada memerlukan syirik. Aku mendangar sorang, Rasulullulah shalalahu ‘alaihi wasallam bersabda : Sesunguhnya ruqyah, tamimah dan tilawah adalah syirik “
Ini ada kesah bujuran, sudah lawas kejadiannya, waktu antri handak memeriksa darah, dihigaku duduk bebinian pinanya kada jua tuha banar, inya bejilbab, membawa anaknya bini-bini kurus karing pinanya, dipenggulunya bekakalung jimat lawan banang hirang. Aku belantih betakun, kenapa anak ikam ini Galuh. Bebibinian itu lalu mengesahkan anaknya itu sudah betahunan awaknya panas dingin lawan batukan kalu mala. Sudah dibawa beobat kemana-mana, ada yang memadahkan kepuhunan, lalu disuruh urang diolahkan jimat benang hirang. Kada mau baik jua, kemuyakannya ulun bawa ke rumah sakit ini, ujar doktor anak ulun ini kena TBC, doktor itu menakuni ulun adakah dirumah yang sakit TBC, bujurai ujar ulun , mintuhan ulun sudah lawas tekena TBC. Ujar dokmtor anak ulun ini tejangkit penyakit kainya. Lalu si uma kakanak yang kena TBC itu aku padahi , buang aja jimat kakalung anak ikam itu, ikam kada bulih percaya jimat itu bisa membaiakan anak ikam. Keramput aja itu. Ikam jadi bedosa ganal, menyekutukan Allah dengan jimat yang kadada apa-apanya. Ikam di keramputi urang. Kalu garing beobat, kada pang memakai jimat. Kalu minta tulung kada pang lawan jimat, minta tulung itu lawan Allah Yang Maha Membari Tulung ke hamba-Nya.
Aku ada membaca dalam kitab Fathul Majid susunan Syaikh Abdurahman Hasan Alu Syaikh, sidin meriwayatkan atsar sahabat Rasullulah shallalahu ‘alaihiwasallam, riwayatnya datang tumat Ibnu Hatim bunyinya macam ini :
“Hudzaifah melihat ada laki-laki ditanganya begalang banang kasan meobati garing panas, lalu sidin pagat galang benang itu, sudah itu sidin membaca firman Allah Ta’ala, “ Dan banyak urang beiman lawan Allah, tapi inya ketuju jua menggawi syirik”
Kalu sudah tahu ikam barataan, bekalung atau begalang banang yang diulah kasan jimat, jangan ikam gawi jua gawian mengaramput itu. Bedosa ganal ikam, kalu ikam kada takutan lawan naraka, ayuha ikam gawi, tasarah ikam aja, ikam jua menyandangnya kena diakhirat. Aku hanya maingatkan aja pang . ( Ampun ma’af ajalah kalu ada kakawalan yang tasinggung, kena handak disambung lagi )
Dituntungkan ba'da shubuh hari ahad, 16 Dzulqaidah 1431 H / 24 Oktober 2010
Tidak ada komentar:
Posting Komentar